Aidha, alisema mtu anayepanda pikipiki bila kuvaa kofia ngumu anamfananisha na mtu anayetaka kumeza vidonge vya klorokwini na pombe kali kwa madhumini ya kutaka kujiua.
Aliyasema hayo juzi jioni katika hafla ya futari iliyoandaliwa na benki ya NMB kwa wateja wake.
Alisema tayari ameshawaagiza askari wa usalama barabarani kuwakamata waendesha pikipiki na abiria wasiovaa kofia ngumu.
“Nimeagiza trafiki wote kwenye mkoa wangu wawakamate na nitawashtaki kwa kosa la kujaribu kujiua,” alisema Makonda.
Katika hatua nyingine Makonda alisema, atautumia mwezi mtukufu wa Ramadhani kutangaza mambo matatu ambayo aliyataja kuwa ni kuongeza muda wa kufanya biashara hasa kwa maduka makubwa kwa kuwa watu wengi ni wafanyakazi hivyo hawana muda wa kufanya manunuzi.
Aidha, atautumia mwezi huu kupiga marufuku uvutaji wa sigara katika maeneo ya mikusanyiko ya watu na pia anaangalia uwezekano wa kudhibiti uvutaji wa shisha.
“Watafiti wangu walikuwa na kazi moja na wameikamilisha, kuna kaugonjwa kapya kameingia kwenye mkoa wetu, kaugonjwa kenyewe ni uvutaji wa shisha, imefikia mahali vijana hawawezi kulala au kula bila kuvuta shisha, sasa hatuwezi kwenda hivyo,” alisema.
Aidha, Makonda aliaomba Waislamu wote kuliombea, taifa lakini pia kuwaombea viongozi ili waweze kuongoza kwa busara na hekima. Awali, Mkurugenzi Mtendaji wa benki ya NMB, Ineke Bussemaker alisema, wameandaa futari hiyo mahususi kwa wateja wao katika kufurahia pamoja mwezi mtukufu wa Ramadhani.
