Agizo hilo limetolewa jana alipokuwa akizungumza na wananchi wa wilaya ya Urambo katika mkutano wa hadhara uliofanyika katika uwanja wa Mwananchi Square wilayani humo.
Mwanri alisema kuwa kama mkoa wa Tabora ukipata mvua za kutosha hautakuwa na upungufu wowote wa chakula ila akatahadharisha kuwa jitahada za makusudi za kutunza chakula ni lazima zichukuliwe ili kuzuia mianya yoyote ya kuuza chakula kiholela.
Alisema wananchi wamepata chakula cha kutosha na ni wajibu wao kila mmoja kuhakikisha anajiwekea akiba ya kutosha ili kumaliza msimu vizuri na kuingia msimu mwingine sambamba na kuacha utegemezi serikalini.
Hata hivyo alimuagiza Mkuu wa Wilaya hiyo, Queen Mlozi, kusimamia vyema na kuhakikisha chakula kilichopo wilayani humo hakiuzwi nje ikiwa ni pamoja kuwachukulia hatua kali za kisheria wafanyabiashara watakaobainika kujihusisha na utoroshaji wa chakula.
Alimtaka Mkuu wa Wilaya hiyo ahakikishe magari yote ya mizigo yanayoingia na kutoka katika wilaya yake yanakaguliwa na ukaguzi ufanywe chini ya maofisa wa Polisi kwa umakini.
