Hali hiyo, ambayo imesababisha hata kipindi cha mapumziko kushindwa kukaa vyumbani imekuwa kero kwa watumiaji.
Uwanja huo unaotumiwa na timu nne zinazoshiriki Ligi Daraja la Pili Tanzania Bara, umekuwa na mazingira mabovu kiasi cha wachezaji kulazimika kukaa uwanjani wakati wa mapumziko kutokana na hali mbaya ya vyumbani.
Vyoo vilivyopo kwenye vyumba vya wachezaji vimekuwa vichafu na umeme umekuwa si wa uhakika pamoja na ubovu wa sehemu ya kuchezea kuwa kipara kutokana na ukosefu wa majani lakini pia umetawaliwa na mashimo katika eneo la kuchezea.
Gazeti hili lilishudia hali hiyo mwishoni mwa wiki wakati wa mechi iliyowakutanisha watoto wa nyumbani Pepsi FC na Arusha FC, wachezaji walishindwa kuingia vyumbani kubadili nguo wakati wa mapumziko na kuamua kukaa uwanjani.
Mechi hiyo iliyomalizika kwa timu ya Pepsi kushinda kwa bao 1-0 dakika ya 40 lililoingizwa kimiani na Eliriki Herman walilazimika kubadili nguo hadharani huku wakishuhudiwa na mashabiki wao.
Akizungumzia hali ya uwanja huo wachezaji hao wa walisema walishindwa kupumzika vyumbani kutokana na hewa nzito iliyokuwa ndani ya vyumba hivyo, ambavyo pia vilikuwa giza kutokana na umeme kukatika.
“Hewa ni nzito mno humo ndani na inaonekana hawajafanya usafi maana hata vyoo ni vichafu halafu hakuna maji tunajisaidiaje huko zaidi ya yote ni giza balaa maana hivyo vyumba havina madirisha bali tunategemea umeme hata kuchukua tahadhari, sasa umeme leo haupo, fikiria kama wewe ni binadamu tunakaaje humo.”
Meneja wa uwanja huo, Jackson Joorwa alisema vyumba hivyo vimekuwa giza kutokana na kukatika kwa umeme na uwanja hauna jenereta. “Suala la kiwanja cha kuchezea uongozi wa juu unashughulikia na ukarabati unaanza mara moja, lakini suala la umeme liko nje ya uwezo wangu maana unaona mwenyewe kuwa mji mzima hauna umeme. Na Jenereta pia tatizo, nifanyeje?”
Msimamizi wa mechi hiyo (kamisaa) Beda Lyimo alisema ni kosa wachezaji kugoma kuingia vyumbani na ameshaandikia taarifa.
