Mbunge wa Afrika Mashariki (EAC), Waziri wa Habari wa Zamani wa nchini Burundi na Mtangazaji Mstaafu wa BBC, Bi. Hafsa Mossi (pichani) ameuawa kwa kupigwa risasi mapema leo katika barabara ya Gihosha, eneo la Nyankoni, jijini Bujumbura, Burundi. Inaelezwa kuwa wauaji waliofanya tukio hilo walikuwa ndani ya gari na walimmiminia risasi kadhaa kifuani Mwanamama huyo na kutimka kuelekea kusikojulikana.
Mbunge huyo aliwahi kufanya kazi na idhaa ya Kiswahili ya BBC.
Msemaji wa rais wa Burundi Bw Willy Nyamitwe amesema amesikitishwa sana na mauaji ya mwanasiasa huyo.
“Nimesikitishwa sana. Dadangu mkubwa Hafsa Mossi, mwanachama wa @EA_Bunge amefariki, amepigwa risasi na wahalifu. R.I.P #Burundi,” ameandika kwenye Twitter.
Waziri wa mambo ya nje Alain Aime Nyamitwe pia ameeleza kusikitishwa kwake na mauaji hayo.
“Nimehuzunishwa sana na mauaji ya leo#Bujumburaya Mheshimiwa Hafsa Mossi, na mwanachama wa#EALA. Ni hasara kuu kwa taifa na#EAC,” ameandika kwenye Twitter.
Bi Mossi alitetea sana haki za wanawake.
